Purtret

L’idea da fundar in chor che unescha giuvenils da l’entir chantun Grischun che chantan gugent è vegnida realisada per l’emprima giada l’onn 2004. Las commembras ed ils commembers dil chor da giuvenils dil Grischun èn tranter 16 e 27 onns e derivan cun preferenza da tuttas regiuns linguisticas e da tut ils districts da chant dal Grischun.

Damai che las Grischunas ed ils Grischuns vivan derasà en l’entira Svizra fa il chor da giuvenils Grischun sias emprovas dapi la fundaziun en furma da project. Mintg’onn durant il mais d’avust s’entaupa il chor che vegn furmads mintg’onn parzialmain da nov tar la emna intensiva da prova a Schiers. L’entir di cuntegn sequenzas d’emprovas, dentant na d‘astga natiralmain era l’aspect social betg vegnir emblidads. Il temp da mezdi e la saira èn reservads per sport, gieus e divertiment.

Las provas vegnan manadas da Martin Zimmermann (scolast da musica ed instruments a la scola media a Schiers). El creescha in’atmosfera agreabla dentant musicalmain fitg activa ed attenta. Organisatoricamain vegn el sustegnì da Andrea Accola (Igis) che organisescha concerts, viadis euv.

Cunquai che las commembras ed ils commembers s’occupan ordavant cun il material da notas e pon consultar medias sco per exempel youtube, po il dirigent lavurar detg spert vid finezzas musicalas empè da mussar singuls tuns.

Terminada vegn nossa emna da prova cun il start dals concerts, en ils quals las novas chanzuns che derivan da differentas epocas musicalas vegnan preschentadas. Ils 5 fin 6 concerts han lieu en l’entir chantun Grischun. Savognin, Jenaz, Bever, Tusaun, Cuira, Glion, Zuoz, Poschiavo, Maiavilla, Valendau, Trun, Valbella, Tavau e blers auters lieus han gia beneventà nus cun mauns averts e han surlaschà a nus durant noss concerts lur baselgias en las qualas nua avain pudì giudair la grondiusa acustica.

Il Chor da giuvenils dal Grischun ha autas finamiras. Sper ils concerts ha il chor gia pudì far part a differents festivals e concurrenzas da chors. Uschia avain nus rimnà bunas experientschas ed avain era gia pudì retschaiver differents premis entras noss chant.

La contribuziun per las commembras ed ils commembras munta a 250.-. Ils auters custs (notas, locals, custs per l’emna da project euv.) vegnan finanziads cun agid da las entradas dals concerts, cun agid da sponsurs ed entras contribuziuns dal chantun.

Il Chor da giuvenils dil Grischun è sco uniun politicamain e confessiunalmain neutrals. El vala sco organisaziun nuneconomica.